Abatuye Amajyaruguru n’Uburengerazuba bijeje Ishyaka PSD kuzarihundagazaho Amajwi

Muri morali nyinshi, intero n’inyikirizo zidasobanya zivanzemo akanyamuneza abaturage bo mu turere tw’intara y’Iburengerazuba no mu ntara y’Amajyaruguru bongeye kwereka ishyaka riharanira demokarasi n’imibereho myiza PSD  ko bazaritora taliki 15 Nyakanga mu matora y’abadepite ndetse bakanatora umukandida iri shyaka rishyigikiye mu matora y’umukuru w’igihugu ariwe Paul KAGAME.

Ni mu gikorwa cyo kwamamaza  abakandida depite cyabereye mu turere twa MUSANZE na RUBAVU, ubwo abayoboke b’ishyaka PSD bagaragazaga ibyiyumviro byabo ku ishyaka bagacinya akadiho ndetse bakaririmba indirimmbo z’ishyaka n’izindi zishyigikira umukandida wabo ku mwanya w’umukuru w’igihugu.

Nyuma yo gusobanurirwa ingingo z’ibitekerezo zigera kuri 60 ishyaka PSD rifite muri manifesto yaryo ya 2024, abatuye mu majyaruguru no mu burengerazuba bijeje iri shyaka ko ntakabuza bakigera mu cyumba cy’itora bazabanza gutora umukandida Paul KAGAME ishyaka PSD rishyigikiye bagakomeza mu bundi bw’ihugiko bw’icyumba cy’itora bakareba ahari ikirango cy’ISHAKA RYEZE ribumbatiwe mu kiganza bagatora ishyaka PSD kugira ngo rikomeze kugira imyanya ihagije mu nteko ishingamategeko kuko aribo ubwabo bakusanyije ibi bitekerezo ishyaka rizaserukana mu matora ndetse bakabyemeza muri congre y’igihugu y’ishyaka yabaye mu kwezi kwa 3 uyu mwaka.

Umwe mubaturage batuye mu karere ka Rubavu wari witabiriye igikorwa cyo kwamamaza ishyaka PSD witwa MUKANDAYISENGA Antoinete yabwiye ikinyamakuru IFATIZO ko ubwo bahitagamo gushyigikira umukandida Paul Kagame mu kwezi kwa 3 mu nteko rusange y’ishyaka yabereye i Kigali  nawe yayitabiriye kandi ijwi rye ntahandi zizajya atari kuri uwo mukandida ku mwanya w’umukuru w’igihugu.

Ku matora y’abagize inteko ishingamategeko MUKANDAYISENGA yagize ati: “Ntahandi igikumye cyanjye kizajya uretse ku IHUNDO RY’ISHAKA RYEZE RIBUMBATIWE MU KIGANZA” kuko ngo nyuma yo kubona ibitekerezo byabo bwite batanze mu myaka 21 ishize ageze mu ishyaka PSD byaragize umumaro ndetse abadepite bashoje manda babigizemo uruhare ngo bishyirwe mu bikorwa ntakabuza azakomeza gutora iri shyaka rimaze imyaka 33 mubufatanye n’indi mitwe ya politike ryubaka igihugu mu nzego zitandukanye kandi ibitekerezo byaryo byibanda ku miberehomyiza y’abaturage, ubutabera na demokarasi aribyo abaturage bakenera mu buzima bwabo bwa buri munsi.

Ibi abihurizaho na KWIZERA Aimable utuye mu karere ka Musanze wacinyaga akadiho muri stade y’akarere ka MUSANZE  aho igikorwa cyo kwamaza ishyaka PSD cyabereye kuri uyu wa 29 Kamena 2024.  AIMABLE yabwiye Itangazamakuru ko uretse morali nyinshi igaragarira buri wese wageze aho ishyaka ryiyamarizaga abaturage b’uturere twa Musanze, Gakenke ndetse n’utundi bihana imbibi bari bitabiriye icyo gikorwa cyo kwamamaza ishyaka bagize uruhare mugushyiraho ibitekerezo bigera kuri 60 bikubiye muri manifesto y’ishyaka PSD mu matora ya 2024.

yakomeje avuga ati: Twebwe ABAKOMBOZI tuzi neza uruhare rukomeye ishyaka ryacu ryagize mu kubaka igihugu mu bufatanye busesuye n’indi mitwe ya politike niyo mpamvu taliki 15 Nyakanga gahunda ari ukuzinduka twagera mu cyumba cy’itora tukareba ahari ihundo ry’ishaka ryeze tugateraho igikumwe” yongeyeho ko bazi neza akamaro abadepite basoje manda bagize mu bikorwa bitandukanye byateje akarere kabo imbere ariyo mpamvu bafite gahunda yo kongera gutora urutonde rw’ishaka PSD kugira ngo  bakomeza kugerwaho n’ibikorwa bikubiye mu ngingo zigera kuri 60 ishyaka PSD rishyize imbere mu matora ateganyijwe mu kwezi kwa 7 uyu mwaka.

Bimwe mu bitekerezo ishyaka PSD rishyize imbere harimo kugabanya umusoro ku nyongeragaciro uzwi nka TVA ukava kuri 18% ukagera kuri 14%, kwandikisha ubutaka bukaba umutungo bwite w’umuntu, gushyiraho umushaharafatizo hagendewe ku nzego z’umurimo ndetse umushahara  udasoreshwa ukava ku bihumbi 60 ukagera ku bihumbi 100, no kongera kuzamura umubare w’abagore bari munzego zifata ibyemezo.

Visi Perezida wa mbere wa PSD Hon. Valens Muhakwa avuga ko bifuza ko mu nzego zifata ibyemezo habamo kuringaniza abagore n’abagabo ku kigero cya 50%, kubera ko aho igihugu kimaze kugera umugore amaze kwiyubaka no gutanga ibitekerezo, ubumenyi, ubushobozi ndetse n’ubuhanga.

Ati: “Kugeza ubu tubona nk’ishyaka PSD ubwo bushobozi abunganya na musaza we, tukavuga tuti mu rwego rw’uburinganire ni ngombwa ko habaho iryo hame rya 50% ku bagore, 50% abagabo, kandi byagaragaye ko nta mpungenge zihari, kuko ibitekerezo umugabo atanga nibyo umugore atanga, ibyo umugore atanga nibyo umugabo atanga, Igihugu kigakomeza gutera imbere hatabayeho ibyatanzwe na runaka.”

Hon Dr. Ngabitsinze Jean Chrysostome, Umunyamabanga Mukuru w’ Ishyaka PSD, yijeje abatuye mu ntara y’iburengerazuba  no mu ntara y’amajyaruguru  ko iterambere Kagame Paul yabagejejeho rizikuba inshuro nyinshi abasaba kutazacikanwa na taliki 15 Nyakanga 2024  ku munsi nyirizina w’amatora ibyo baririmbaga muri morali nyinshi bazabishyire mu bikorwa  batore umukandida wa PSD ku mwanya w’umukuru w’igihugu Paul KAGAME ndetse batore PSD mu matora y’Abadepite. Yagize:” Ati mwabonye ko dusobanitse kandi turi intumwa itumika”.